2020-04-02
又到肌肉鍛鍊的課堂啦，今次邦Sir繼續帶大家到海旁做運動！大家可能會諗，我唔係想練大隻喎，點解要經常做肌肉力量訓練？其實有足夠的肌肉耐力對任何人都好重要，尤其係長者！
當下肢肌肉耐力足夠，就好似一座大廈咁，地基打得好，無咁易跌倒；當核心肌肉耐力充夠，就可以保護脊椎及維持軀幹穩定性，維持正確姿勢；當上肢肌肉耐力足夠，就可以幫助在跌倒時用手支撐身體，防止受傷。
雖然而家疫情嚴重，大家未必可以去公園做運動，不過大家千祈唔好因為咁樣而偷懶呀，其實以上訓練一樣可以喺屋企做架！
--------------------------------------------------
訓練內容：蟹步、改良版平板支撐、V-Sit
所訓練身體部位：大腿肌肉、臀部肌肉、手臂肌肉、腰腹肌肉、核心肌肉
注意事項及建議：
1）訓練前需有足夠熱身
2）保持呼吸暢順
3）如身體有新舊傷患（如膝關/髖/肩/腰等部位），可能導致部份動作進行時受限制，可以在進行前先向主教練查詢，再自行加以調整
4）蟹步：來回為之一次，10次為之一組，重覆2至3組
5）改良版平板支撐：「落落上上」動作為之一次，8至10次為之一組，重覆2至3組
6）V-Sit：維持20至30秒為之一組，重覆2至3組
7）如腰部較弱人士，進行V sit時先以單腳進行（另一腳支撐在地上）
8）組與組中間休息60至90秒
好處：
1）日常生活中比較少進行橫向的動作，蟹步為不同平面的訓練，可以改善肌肉耐力及平衡力，有助防止跌倒
2）改良版平板支撐可加強核心肌肉耐力，有助保護脊椎及維持軀幹穩定性，可以減低受傷風險及維持正確姿態
3）改良版平板支撐亦可訓練手臂肌肉耐力，對日常拿取重物，或跌倒時用手支撐身體防止受傷亦有幫助
4）透過V-Sit鍛鍊大腿及腰腹肌肉耐力，可以加強身體穩定性，有助防跌，同時亦可改善身體姿勢